Boggula Srinivas Death: యూట్యూబర్,
వివాదాస్పద రచయిత బొగ్గుల శ్రీనివాస్ మరణం ప్రస్తుతం తెలంగాణ రాజకీయ, సామాజిక వర్గాల్లో పెను సంచలనంగా మారింది. ఖమ్మం జిల్లాలోని పాలేరు జలాశయంలోకి ఆయన ప్రయాణిస్తున్న కారు దూసుకెళ్లడం, ఈ ప్రమాదంలో ఆయన ప్రాణాలు కోల్పోవడం వెనుక పలు అనుమానాలు వ్యక్తమవుతున్నాయి. ముఖ్యంగా కారు వెనుక సీట్లో కూర్చున్న శ్రీనివాస్ మరణించగా, డ్రైవర్ సురక్షితంగా బయటపడి అక్కడి నుండి పరారవ్వడం ఈ మరణంపై అనేక సందేహాలకు తావిస్తోంది.
బొగ్గుల శ్రీనివాస్ ఆంధ్రప్రదేశ్ రాష్ట్రం కర్నూలు జిల్లాకు చెందినవారు. ఆయన వృత్తిరీత్యా సాఫ్ట్వేర్ ఇంజనీర్ అయినప్పటికీ, సామాజిక, రాజకీయ అంశాలపై ఉన్న ఆసక్తితో యూట్యూబర్ గా మారారు. రాజకీయ విశ్లేషణలు చేస్తూ, తనదైన శైలిలో విమర్శలు గుప్పిస్తూ సోషల్ మీడియాలో గుర్తింపు తెచ్చుకున్నారు. కేవలం విశ్లేషణలకే పరిమితం కాకుండా, సమాజంలో జరుగుతున్న పరిణామాలపై పుస్తకాలు రాయడం ద్వారా ఆయన చర్చనీయాంశంగా మారారు.
బొగ్గుల శ్రీనివాస్ పేరు ప్రముఖ్యతలోకి రావడానికి ప్రధాన కారణం ఆయన రాసిన ‘పవన్ కళ్యాణ్ హఠావో.. పాలిటిక్స్ బచావో’ అనే పుస్తకం. ఈ పుస్తకంలో జనసేన అధినేత పవన్ కళ్యాణ్ రాజకీయ ప్రస్థానంపై, ఆయన సిద్ధాంతాలపై శ్రీనివాస్ తీవ్రమైన విమర్శలు చేశారు. పవన్ కళ్యాణ్ రాజకీయాల్లోకి రావడం వల్ల కలిగే పరిణామాలను తన కోణంలో విశ్లేషిస్తూ రాసిన ఈ పుస్తకం అప్పట్లో పెద్ద దుమారాన్నే రేపింది.
ఈ పుస్తకం విడుదలైన సమయంలో జనసేన కార్యకర్తలు, పవన్ కళ్యాణ్ అభిమానుల నుండి శ్రీనివాస్ తీవ్ర నిరసనలు ఎదుర్కొన్నారు. అనేక చోట్ల ఆయనపై దాడులు జరిగినట్లు, బెదిరింపులు వచ్చినట్లు వార్తలు వచ్చాయి. రాజకీయ నాయకులను లక్ష్యంగా చేసుకుని ఆయన చేసే విమర్శలు, ఆయన రాసిన పుస్తకాలు నిరంతరం వివాదాలకు కేంద్రబిందువుగా నిలిచేవి. ఈ నేపథ్యం వల్ల, ఇప్పుడు పాలేరు జలాశయంలో జరిగిన ప్రమాదాన్ని కేవలం ఒక ప్రమాదంగా చూడలేమని, దీని వెనుక ఏదైనా కుట్ర ఉందేమోనన్న అనుమానాలు ఆయన అనుచరులు వ్యక్తం చేస్తున్నారు.
ప్రస్తుతం పోలీసులు ఈ ఘటనపై కేసు నమోదు చేసి దర్యాప్తు చేస్తున్నారు. పరారీలో ఉన్న డ్రైవర్ను పట్టుకుంటేనే అసలు నిజాలు బయటపడే అవకాశం ఉంది. పాలేరు జలాశయం వద్ద మత్స్యకారులు చెప్పిన వివరాల ప్రకారం, కారు నీటిలోకి వెళ్లకముందే డ్రైవర్ బయటకు దూకడం అనేక అనుమానాలను బలపరుస్తోంది. పోస్ట్మార్టం నివేదిక, పోలీసుల విచారణలో ఈ మిస్టరీ వీడే అవకాశం ఉంది.
Also read
- తెల్లారితే నిశ్చితార్థం.. షాప్కు వెళ్తానని చెప్పి వెళ్లిన యువకుడు.. కట్చేస్తే..
- కనిపెంచిన తల్లిదండ్రుల బాగోగులు పట్టించుకోని మీరూ కొడుకులేనా.? వీరు ఏం చేశారో తెలిస్తే..!
- అక్క పెళ్లి కోసమని ఇంటికి వచ్చాడు.. అంతలోనే అనంతలోకాలకు..!
- ఏ కాలంలో ఉన్నాం మనం ఇంకా.. ఎటు పోతుంది సమాజం.. తాగుడు కోసం ఇంత దారుణమా?
- ఆస్తి వివాదం – వ్యక్తిపై యాసిడ్ దాడి – పరిస్థితి విషమం
