యాదాద్రి గురుకుల కేసులో కీలక మలుపు
యాదాద్రి భువనగిరి జిల్లాలోని బాలికల గురుకుల పాఠశాలలో విద్యార్థినులపై లైంగిక వేధింపుల ఘటన తీవ్ర కలకలం రేపుతోంది. విద్యాబుద్ధులు నేర్పించి, బాలికలకు రక్షణ కల్పించాల్సిన పాఠశాలలోనే ఇలాంటి ఘటన చోటుచేసుకోవడం తల్లిదండ్రులను ఆందోళనకు గురిచేస్తోంది. తాజాగా ఈ వ్యవహారంలో పోలీసులు కీలక చర్యలు చేపట్టారు. విద్యార్థినులపై వేధింపులకు పాల్పడినట్లు ఆరోపణలు ఎదుర్కొంటున్న వంటమనిషితో పాటు, కాంట్రాక్టర్, ప్రిన్సిపాల్పై కేసులు నమోదు చేసి ముగ్గురినీ అరెస్టు చేశారు. వీరిని కోర్టులో హాజరుపరచనున్నారు.
రూ.500, రూ.1,000 ఆశ చూపుతూ వేధింపులు..
యాదాద్రి భువనగిరి జిల్లా అడ్డగూడూరు మండలంలోని తెలంగాణ సాంఘిక సంక్షేమ బాలికల గురుకుల పాఠశాలలో ఈ ఘటన వెలుగులోకి వచ్చింది. పాఠశాలలో వంటమనిషిగా పనిచేస్తున్న వెంకన్న గత కొంతకాలంగా విద్యార్థినుల పట్ల అసభ్యంగా ప్రవర్తిస్తున్నట్లు ఆరోపణలు వచ్చాయి. రూ.500, రూ.1,000 ఇస్తానంటూ తమ వద్దకు రావాలని బాలికలను వేధించినట్లు బాధితులు వెల్లడించారు. సుమారు 20 మంది విద్యార్థినులు ఈ వేధింపులకు గురైనట్లు తొలుత ఆరోపణలు వచ్చాయి. అయితే ప్రాథమిక విచారణలో ఐదుగురు విద్యార్థినులపై అతడు అసభ్యంగా ప్రవర్తించినట్లు అధికారులు గుర్తించినట్లు వార్తలు వచ్చాయి.
ప్రిన్సిపాల్పైనా ఆరోపణలు..
ఈ ఘటనపై బాధిత విద్యార్థినులు గతంలోనే ప్రిన్సిపాల్ ఝాన్సీరాణికి ఫిర్యాదు చేసినట్లు సమాచారం. అయినప్పటికీ సరైన చర్యలు తీసుకోకుండా, ఈ విషయం బయటకు చెప్పవద్దని విద్యార్థినులకు సూచించినట్లు ఆరోపణలు వచ్చాయి. విషయం తల్లిదండ్రులకు తెలియడంతో వారు పాఠశాల వద్ద ఆందోళనకు దిగారు. దీంతో ఈ వ్యవహారం వెలుగులోకి వచ్చింది.
కేసులు నమోదు.. ముగ్గురిపై చర్యలు
తాజా సమాచారం ప్రకారం.. ఈ వ్యవహారంలో వంటమనిషి వెంకన్న, కాంట్రాక్టర్ సోమయ్య, ప్రిన్సిపాల్ ఝాన్సీరాణిపై పోలీసులు కేసులు నమోదు చేసి అరెస్టు చేశారు. ముగ్గురినీ కోర్టులో హాజరుపరిచేందుకు పోలీసులు సిద్ధమయ్యారు. మరోవైపు విద్యార్థినుల భద్రత విషయంలో నిర్లక్ష్యంగా వ్యవహరించినందుకు ప్రిన్సిపాల్పై ఉన్నతాధికారులు ఇప్పటికే సస్పెన్షన్ వేటు వేసినట్లు సమాచారం.
ఈ ఘటనతో గురుకుల పాఠశాలల్లో బాలికల భద్రత, పర్యవేక్షణపై మరోసారి ప్రశ్నలు తలెత్తుతున్నాయి. విద్యార్థినులకు న్యాయం చేయడంతో పాటు, ఇలాంటి ఘటనలు పునరావృతం కాకుండా కఠిన చర్యలు తీసుకోవాలని తల్లిదండ్రులు కోరుతున్నారు.
Also read
- చిన్నారి కిడ్నాప్.. 12 గంటల్లోనే ఛేదించి తల్లి ఒడికి చేర్చిన పోలీసులు
- రిమాండ్ ఖైదీ విడుదల కోసం న్యాయమూర్తి సంతకం ఫోర్జరీ
- హైదరాబాద్ యువకుడు మృతి.. తుపాకీ ప్రమాదవశాత్తు పేలింది
- మళ్లీ వచ్చేశారు.. వణికిస్తున్న ముసుగు దొంగలు.. మారణాయుధాలతో కాలనీల్లో సంచారం!
- ఫుడ్ పాయిజన్ కలకలం.. మండీ బిర్యానీ తిని చిన్నారులు సహా 9 మందికి అస్వస్థత!





