విద్యుదాఘాతానికి గురై భార్యాభర్తలు మృతి

గోపాలపురం: విద్యుదాఘాతానికి గురై భార్యాభర్తలు మృతి చెందారు. ఈ ఘటన గురువారం తూర్పుగోదావరి జిల్లా గోపాలపురంలోని కుమ్మరికుంట కాలనీలో జరిగింది. గ్రామానికి చెందిన పెంటబోయిన అప్పల నరసమ్మ(53), పెంటబోయిన పెద్ద బంగారయ్య(57) భార్యాభర్తలు. ఈ రోజు ఉదయం నరసమ్మ ఉతికిన దుస్తులను ఆరేస్తుండగా.. తమ ఇల్లు(రేకులషెడ్)కు ఆనుకుని ఉన్న విద్యుత్ తీగలు తగిలాయి. దీంతో ఆమె విద్యుదాఘాతానికి గురైంది. అక్కడే ఉన్న బంగారయ్య.. భార్యను కాపాడబోయి తాను కూడా విద్యుత్ షాక్కు గురై మృతి చెందారు. సమాచారం అందుకున్న గోపాలపురం పోలీసులు ఘటనాస్థలికి చేరుకుని వివరాలు సేకరించారు. ఈ ఘటనపై కేసు నమోదు చేసి దర్యాప్తు చేపట్టారు.