పల్నాడు జిల్లాలో విషాద ఘటన చోటుచేసుకుంది. ముప్పాళ్ల మండలం లంకెలకూరపాడులో ప్రైవేట్ స్కూల్ బస్సు ఢీకొనడంతో మూడేళ్ల బాలుడు మృతి చెందాడు. ఈ ఘటన స్థానికంగా తీవ్ర విషాదాన్ని నింపింది. సమాచారం అందుకున్న పోలీసులు సంఘటనాస్థలానికి చేరుకుని దర్యాప్తు చేపట్టారు.
స్థానికుల వివరాల ప్రకారం.. లంకెలకూరపాడుకు చెందిన ఓ కుటుంబం తమ పిల్లలను పాఠశాలకు పంపేందుకు సిద్ధమైంది. బాలుడి అన్న సిద్దార్థ్‌ను స్కూల్ బస్సు ఎక్కించేందుకు తల్లి రోడ్డుపైకి వచ్చింది. ఆమె వెంట మూడేళ్ల చిన్నారి నితిన్ కూడా బయటకు పరిగెత్తుకుంటూ వచ్చాడు. అదే సమయంలో విద్యార్థులను తీసుకెళ్లేందుకు వచ్చిన ప్రైవేట్ స్కూల్ బస్సు అక్కడికి చేరుకుంది.
అయితే బస్సు డ్రైవర్ రవి రోడ్డుపై ఉన్న నితిన్‌ను గమనించకపోవడంతో చిన్నారిని బస్సు ఢీకొట్టింది. ప్రమాదంలో తీవ్రంగా గాయపడిన నితిన్ అక్కడికక్కడే మృతి చెందినట్లు స్థానికులు తెలిపారు. ఒక్కసారిగా జరిగిన ఘటనతో తల్లి, కుటుంబ సభ్యులు తీవ్ర విషాదంలో మునిగిపోయారు. ప్రమాదం జరిగిన వెంటనే బస్సును అక్కడే వదిలి డ్రైవర్ రవి పరార్ అయ్యాడు. ఈ ఘటనపై సమాచారం అందుకున్న పోలీసులు అక్కడికి చేరుకుని వివరాలు సేకరించారు. బస్సును స్వాధీనం చేసుకుని ప్రమాదానికి గల కారణాలపై దర్యాప్తు చేపట్టినట్లు తెలుస్తోంది. డ్రైవర్ కోసం పోలీసులు గాలింపు చర్యలు చేపట్టారు.
చిన్నారి మృతితో లంకెలకూరపాడులో విషాద ఛాయలు అలుముకున్నాయి. పాఠశాల బస్సుల డ్రైవర్లు అప్రమత్తంగా వ్యవహరించాల్సిన అవసరాన్ని ఈ ఘటన మరోసారి గుర్తు చేసింది.
Also read
- Diwali: దీపావళి రాత్రి ఈ 5 ఆచారాలు అస్సలు మిస్ కాకండి.. లక్ష్మీదేవి అనుగ్రహంతో సిరిసంపదలు లభిస్తాయట!
- Diwali: తొలి దీపావళి అంటే ఏమిటి? కొత్త దంపతుల జీవితంలో ఈ పండుగకు ఎందుకంత ప్రత్యేకత?
- Diwali: దీపావళికి ఏ లక్ష్మీ-గణేశ విగ్రహాలను కొనాలి? ఏ రూపం శుభప్రదమో తెలుసా?
- నందా దీపం ఎప్పుడు వెలిగించాలి..? లక్ష్మీ కటాక్షం కోసం దీపావళి రోజున ఈ పనులు తప్పక చేయండి..
- కన్న కొడుకు కోరిక తీర్చిన తల్లిదండ్రులు.. 24 గంటలు గడవకముందే తీరని విషాదం!
