Crime News : ప్రకాశం జిల్లా మార్కాపురం పరిధిలోని యర్రగొండపాలెంలో ఒళ్ళు గగుర్పొడిచే దారుణ ఘటన వెలుగులోకి వచ్చింది. తన కూతురితో సన్నిహితంగా ఉంటున్నాడనే కక్షతో ఓ వ్యక్తి, ఒక యువకుడిని దారుణంగా హత్య చేశాడు. అంతటితో ఆగకుండా మృతదేహాన్ని ముక్కలుగా నరికి, ఎవరికీ అనుమానం రాకుండా ఉండేందుకు సమీపంలోని ఒక పాడుబడిన బోరుబావిలో పడేసాడు. ఈ ఘోరంగ్రామంలో తీవ్ర కలకలం రేపడమే కాకుండా, స్థానికులను భయాందోళనలకు గురిచేస్తోంది.
పోలీసులు, స్థానికులు తెలిపిన వివరాల ప్రకారం.. యర్రగొండపాలెం గ్రామానికి చెందిన ఆంజనేయులు అనే యువకుడిని, అదే గ్రామానికి చెందిన వెంకటనారాయణ అనే వ్యక్తి అత్యంత కిరాతకంగా అంతమొందించాడు. వెంకటనారాయణ కూతురితో ఆంజనేయులు సన్నిహితంగా ఉంటున్నాడనే అనుమానమే ఈ దారుణ హత్యకు దారితీసింది. ఈ విషయమై గత కొంతకాలంగా ఇరు కుటుంబాల మధ్య తీవ్ర గొడవలు, ఉద్రిక్త పరిస్థితులు నడుస్తున్నాయి. ఈ క్రమంలోనే ఆంజనేయులుపై పగ పెంచుకున్న వెంకటనారాయణ, అతడిని వదిలించుకోవాలని పక్కా ప్లాన్ వేశాడు.
కొన్ని రోజుల క్రితం ఆంజనేయులు అకస్మాత్తుగా కనిపించకుండా పోయాడు. ఆందోళన చెందిన కుటుంబ సభ్యులు బంధువులు, స్నేహితుల ఇళ్లలో మరియు పలుచోట్ల వెతికినా అతని ఆచూకీ లభించలేదు. దీంతో అనుమానం వచ్చి వారు పోలీసులను ఆశ్రయించి ఫిర్యాదు చేశారు. కేసు నమోదు చేసుకున్న పోలీసులు దర్యాప్తు ప్రారంభించగా, పాత గొడవల నేపథ్యంలో వెంకటనారాయణపై బలమైన అనుమానం వ్యక్తమైంది. ఆ దిశగా విచారణ జరపడంతో ఈ ఘోర ఉదంతం విస్తుపోయే నిజాలతో సహా బయటపడింది.
ఆంజనేయులును హతమార్చిన తర్వాత, మృతదేహం దొరికితే తను దొరికిపోతానని భయపడిన వెంకటనారాయణ దాన్ని మాయం చేయాలనుకున్నాడు. శవాన్ని ఎవరూ గుర్తుపట్టకుండా ఉండేందుకు అత్యంత క్రూరంగా ముక్కలుగా నరికాడు. ఆ శరీర భాగాలను మూటగట్టి, సమీపంలోని పొలాల్లో ఉన్న బోరుబావిలో పడేశాడు. విషయం తెలుసుకున్న పోలీసులు వెంటనే సంఘటనా స్థలానికి చేరుకుని ఆధారాలు సేకరించారు. మృతదేహ అవశేషాలను వెలికితీసేందుకు ఫోరెన్సిక్ నిపుణులను కూడా రంగంలోకి దించినట్లు సమాచారం.
ఈ కిరాతక ఘటనతో యర్రగొండపాలెంలో ఒక్కసారిగా ఉద్రిక్త పరిస్థితులు నెలకొనడంతో పోలీసులు అప్రమత్తమయ్యారు. ప్రస్తుతం నిందితుడు వెంకటనారాయణను పోలీసులు అదుపులోకి తీసుకుని విచారిస్తున్నట్లు తెలుస్తోంది. ఈ హత్య వెనుక ఇంకా ఎవరిదైనా ప్రమేయం ఉందా, ఎవరైనా సహకరించారా అనే కోణంలో పోలీసులు లోతుగా దర్యాప్తు చేస్తున్నారు. కంటికి రెప్పలా పెంచుకున్న కొడుకును ముక్కలుగా నరికి చంపిన నిందితుడికి కఠినాతికఠినమైన శిక్ష విధించాలని ఆంజనేయులు కుటుంబ సభ్యులు, స్థానికులు కన్నీరుమున్నీరవుతూ డిమాండ్ చేస్తున్నారు.
Also read
- బాలికను వివాహం చేసుకున్న కానిస్టేబుల్ పై కేసు
- స్పా సెంటర్లో భార్యను చంపిన భర్త..!
- దొంగ అంటూ ముద్ర వేశారని… హెచ్సీయూ విద్యార్థి చెరువులో దూకి ఆత్మహత్య
- కూతురితో సన్నిహితంగా ఉన్నాడని ముక్కలుగా నరికి…
- పోలీస్ స్టేషన్లో లంచం తీసుకుంటూ ఏసీబీకి రెడ్హ్యాండెడ్గా చిక్కిన మహిళ ఎస్సై
