Mauni Amavasya 2026: జనవరిలో మౌని అమావాస్య ఎప్పుడు? స్నానాలకు, దానాలకు సరైన సమయం ఏది?

హిందూ క్యాలెండర్‌లో అత్యంత పవిత్రమైన రోజులలో ఒకటిగా భావించే మౌని అమావాస్య, మాఘ మాసంలో వస్తుంది. ఈ రోజున మౌనంగా ఉంటూ చేసే ధ్యానం మనిషిని అంతర్గతంగా శక్తివంతుడిని చేస్తుందని పెద్దలు చెబుతుంటారు. 2026లో ఈ విశిష్ట పర్వదినం ఎప్పుడు వస్తోంది, ఆ రోజున పాటించాల్సిన నియమాలు దానధర్మాల వల్ల కలిగే ఫలితాల గురించి ఈ కథనంలో వివరంగా తెలుసుకుందాం.

మాటల కంటే మౌనం శక్తివంతమైనదని నిరూపించే రోజే మౌని అమావాస్య. గంగానది తీరాన లక్షలాది మంది భక్తులు పవిత్ర స్నానాలు ఆచరించే ఈ రోజుకు పితృ దేవతల ఆశీస్సులను పొందే శక్తి కూడా ఉంది. జనవరి 2026లో రాబోతున్న ఈ అమావాస్య తిథి విశేషాలను, పుణ్యకాలం ముహూర్తాలను ఇక్కడ అందిస్తున్నాం.

మౌని అమావాస్య శుభ ముహూర్తం, తేదీ

2026 సంవత్సరంలో మాఘ మాసపు అమావాస్య లేదా మౌని అమావాస్య జనవరి 18, ఆదివారం నాడు వస్తోంది. అమావాస్య తిథి జనవరి 18వ తేదీ తెల్లవారుజామున 12:03 గంటలకే ప్రారంభమై, జనవరి 19వ తేదీ తెల్లవారుజామున 01:21 గంటల వరకు ఉంటుంది. ఉదయ తిథి ప్రాముఖ్యత దృష్ట్యా, జనవరి 18వ తేదీనే భక్తులు పవిత్ర స్నానాలు ఆచరించి, దానధర్మాలు నిర్వహించుకోవాలి. ముఖ్యంగా బ్రహ్మ ముహూర్తంలో అంటే ఉదయం 05:27 నుండి 06:21 గంటల మధ్య స్నానం చేయడం అత్యంత శ్రేష్ఠమని శాస్త్రాలు చెబుతున్నాయి.

మౌనం వెనుక ఉన్న మహత్తర శక్తి

ఈ అమావాస్య రోజున మౌన వ్రతం పాటించడం వెనుక ఒక గొప్ప అర్థం ఉంది. మన పురాణాల ప్రకారం, ఈ రోజే మానవజాతికి మూలపురుషుడైన ‘మనువు’ జన్మించారు. అందుకే దీనిని మౌని అమావాస్య అని పిలుస్తారు. రోజంతా మాటలు ఆపి మౌనంగా ఉండటం వల్ల మనస్సులోని అలజడి తగ్గి, ఏకాగ్రత పెరుగుతుంది. మాటల ద్వారా వెచ్చించే శక్తిని ఆదా చేసి, దానిని దైవ చింతనలో ఉపయోగించడం వల్ల అద్భుతమైన మానసిక ప్రశాంతత లభిస్తుంది. ఒకవేళ రోజంతా మౌనంగా ఉండటం వీలుకాకపోయినా, స్నానం పూజ చేసే సమయంలోనైనా మౌనం పాటించడం శుభప్రదం.

దానధర్మాలు, పితృ తర్పణాల విశిష్టత

మౌని అమావాస్య నాడు చేసే దానాలకు ఇతర రోజుల కంటే వేల రెట్లు ఎక్కువ ఫలితం ఉంటుందని నమ్ముతారు. ఈ రోజున నువ్వులు, వస్త్రాలు, దుప్పట్లు లేదా అన్నదానం చేయడం వల్ల జాతకంలోని దోషాలు తొలగిపోతాయి. ముఖ్యంగా పితృ దేవతల స్మరణ చేస్తూ తర్పణాలు వదలడం వల్ల పితృ దోషాల నుండి విముక్తి లభిస్తుంది. గంగా నది వంటి పవిత్ర నదులలో స్నానం చేయడం సాధ్యపడనప్పుడు, ఇంట్లోనే స్నానం చేసే నీటిలో కొద్దిగా గంగాజలం కలుపుకుని స్నానం చేసినా అంతే ఫలితం దక్కుతుంది.