విశ్వం చుట్టివచ్చిన కార్తికేయుడు తర్వాత ఏమయ్యాడు?.. అసలు కథ ఈ గుడిలోనే ఉంది..

భారతదేశంలో శివుడు, పార్వతిల కుమారులైన కార్తికేయ స్వామి, గణేశుడు గురించి కథలు చాలామంది వినే ఉంటారు. అయితే, ఎక్కువగా చెప్పే కథ ఏమిటంటే.. శివుడు తన కుమారులను ఏడు సార్లు విశ్వం చుట్టి రావాలని అడిగాడు. విధేయత కలిగిన కుమారుడు కార్తికేయుడు వెంటనే ఆ సుదీర్ఘ, కష్టమైన ప్రయాణం మొదలు పెట్టాడు. అయితే గణేశుడు వివేకంతో తన తల్లిదండ్రుల చుట్టూ ప్రదక్షిణ చేసి వారినే తన విశ్వం అని చెప్పాడు. గణేశుడి తెలివితేటలకు సంతోషించిన శివుడు, అతనికి మొదటి పూజ స్థానం ఇచ్చాడు.

చాలా కథలు ఇప్పటివరకు మీరు తెలుసుకున్న దాంతో ఆగిపోతాయి. కానీ దీనికి మించి మరో కథనం ఉంది. కార్తికేయుడు తిరిగి వచ్చి, ఏం జరిగిందో తెలుసుకుని, తనను విస్మరించారు అని భావించాడు. తన తల్లిదండ్రుల పట్ల ఉన్న అంకిత భావాన్ని నిరూపించుకునేందుకు కార్తికేయుడు ఇక్కడ తన దేహాన్ని సమర్పించుకున్నాడని అంటారు. దాంతోపాటు ఆయన లోకంలోని అన్ని సుఖాలను త్యాగం చేశాడు. తన ‘శరీరం, ఎముకలను’ శివుడికి సమర్పించాడు. కొన్ని పురాణాల ప్రకారం, కార్తికేయుడు ఒంటరిగా ఉండడానికి, ఆత్మ పరిశీలన చేసుకోవడానికి ఉత్తరాఖండ్‌లోని క్రోంచ్ పర్వతంపైకి వచ్చాడు. మరికొన్ని కథలు ఆయన ఎముకలు ఈ పర్వతంపై పడ్డాయి అని చెప్తాయి. ఆయన ఎముకలు పడిన ఆ ప్రదేశమే ఇప్పుడు అందమైన కార్తికేయస్వామి దేవాలయంగా ఉంది.

ఉత్తరాఖండ్‌లోని అత్యంత ఎత్తైన ఆలయం
రుద్రప్రయాగ జిల్లాలోని కనకచౌరి అనే గ్రామంలో కార్తిక్ స్వామి దేవాలయం ఉంది. క్రోంచ్ పర్వతంపై ఉన్న ఈ ఆలయం, కార్తికేయ స్వామి భక్తులకు లోతైన ప్రాధాన్యత కలిగి ఉంది. ఈ దేవాలయం ఉత్తరాఖండ్‌లో ఈ దేవుడికి అంకితమైన అత్యంత ఎత్తైన దేవాలయాలలో ఒకటి. దాన్ని చేరుకునే ప్రయాణం, దానికి సంబంధించిన కథలంత అర్థవంతమైనది.

ఆలయాన్ని చేరుకోవడం ఎలా?
కనకచౌరి నుండి మూడు కిలోమీటర్ల నడక తర్వాత ఈ ఆలయం చేరుకోవచ్చు. ఆ తర్వాత కొన్ని మెట్లు ఎక్కాలి. ఇది అంత కష్టమైన ట్రెక్ కాదు. ఈ ప్రయాణంలో పైన్ అడవులతో నిండిన ప్రకృతి దృశ్యాన్ని చూడవచ్చు. వాతావరణం స్పష్టంగా ఉంటే, బందర్‌పుంఛ్, కేదార్‌నాథ్ డోమ్, చౌఖంబ లాంటి హిమాలయ శిఖరాల అద్భుత దృశ్యాలు కళ్ళ ముందు ఉంటాయి. ఆ పర్వతంపై చివరి భాగం ఇరుకైన అంచు వెంట ఉంటుంది. అక్కడ రెండు వైపులా హిమాలయాల వీక్షణ దొరుకుతుంది.

ఆలయం చిన్నదైనా, దాని చుట్టూ ఉన్న ప్రకృతి దాన్ని ప్రత్యేకంగా నిలబెడుతుంది. ఏడాది పొడవునా సందర్శకుల రాకపోకలు స్థిరంగా ఉన్నా, అక్టోబర్ నుండి జూన్ మధ్య ఆలయాన్ని సందర్శించడానికి ఉత్తమ సమయం. కార్తీక పౌర్ణమి రోజున, జూన్‌లో జరిగే కలశ యాత్ర సమయంలో చాలా మంది భక్తులు ఆలయాన్ని సందర్శిస్తారు.