నల్ల దారం లేదా కాలా ధాగా భారతీయ సంప్రదాయాల్లో చాలా ప్రత్యేక స్థానం ఉంది. చిన్న పిల్లల నుంచి పెద్దల వరకు చాలామంది చేతికి, కాలికి నల్ల దారం కట్టుకుంటూ కనిపిస్తారు. దృష్టి దోషం దూరం కావాలని కొందరు నమ్ముతారు. మరికొందరు శని ప్రభావం తగ్గాలని ఆశిస్తూ ఈ దారం ధరిస్తారు. జ్యోతిష్య శాస్త్రం ప్రకారం నల్ల రంగు ప్రతికూల శక్తులను దూరం చేసే శక్తి కలిగి ఉంటుందని చెబుతారు. అందుకే నల్ల దారం కట్టుకుంటే చెడు శక్తుల ప్రభావం తగ్గుతుందని విశ్వాసం కొనసాగుతోంది.
నల్లదారానికి శనికి సంబంధం?
జ్యోతిష్య నిపుణుల అభిప్రాయం ప్రకారం శని గ్రహానికి నల్ల రంగుతో ప్రత్యేక సంబంధం ఉంది. అందుకే శని దోషాలు తగ్గేందుకు చాలామంది శనివారం రోజున నల్ల దారం ధరిస్తున్నారు. ముఖ్యంగా మకరం, కుంభం రాశుల వారికి ఇది మంచి ఫలితాలు ఇవ్వొచ్చని చెబుతున్నారు. ఈ రెండు రాశులపై శని ప్రభావం ఎక్కువగా ఉంటుందని భావిస్తారు. అలాగే మేషం, వృశ్చికం రాశుల వారికి కోపం త్వరగా వస్తే నల్ల దారం మానసిక ప్రశాంతత ఇవ్వొచ్చని జ్యోతిష్య వర్గాలు చెబుతున్నాయి. కొందరు ఉద్యోగ సమస్యలు తగ్గాలని ఆశిస్తూ కూడా నల్ల దారం కట్టుకుంటున్నారు.
ఎవరు ఏ కాలికి కట్టుకోవాలి?
నల్ల దారం కట్టే విషయంలో కొన్ని సంప్రదాయాలు ఇప్పటికీ కనిపిస్తున్నాయి. మహిళలు ఎడమ కాలికి కట్టుకోవడం మంచిదని కొందరు చెబుతారు. పురుషులు కుడి కాలికి కట్టుకునే ఆచారం చాలాచోట్ల ఉంది. కొందరు చేతికి కూడా కట్టుకుంటారు. శనివారం రోజున పూజలు చేసి నల్ల దారం ధరించడం శుభంగా భావిస్తారు. “ఓం శం శనైశ్చరాయ నమః” మంత్రం జపిస్తూ కట్టుకుంటే మంచి ఫలితాలు వస్తాయని జ్యోతిష్య నిపుణులు సూచిస్తున్నారు. కొందరు ఆలయాల్లో పూజలు చేయించి దారం ధరించే సంప్రదాయం కూడా పాటిస్తున్నారు.
చిన్న పిల్లలకు నల్ల దారం కట్టే ఆచారం ఇప్పటికీ చాలా కుటుంబాల్లో కొనసాగుతోంది. పిల్లలకు దృష్టి తగలకుండా ఉండాలని పెద్దలు నమ్ముతారు.
వ్యాపారాల్లో నష్టాలు తగ్గాలని కోరుకునే వారు కూడా నల్ల దారం ధరిస్తున్నారు. కొందరు ఆర్థిక ఇబ్బందులు తగ్గుతాయని విశ్వసిస్తున్నారు. రాహు, కేతు ప్రభావాలు తగ్గేందుకు కూడా ఇది ఉపయోగపడుతుందని జ్యోతిష్య శాస్త్రం చెబుతోంది. అయితే ఇవన్నీ విశ్వాసాల ఆధారంగా ఉన్న అభిప్రాయాలేనని గుర్తుంచుకోవాలి. శాస్త్రీయ ఆధారాలు మాత్రం స్పష్టంగా లేవని కొందరు నిపుణులు చెబుతున్నారు.
అయితే ప్రతి ఒక్కరికీ నల్ల దారం సరిపోదని జ్యోతిష్య నిపుణులు హెచ్చరిస్తున్నారు. జాతకంలో గ్రహ స్థితులు ఎలా ఉన్నాయో తెలుసుకుని మాత్రమే ధరించడం మంచిదని సూచిస్తున్నారు. సరైన సలహా లేకుండా ఏ ఆధ్యాత్మిక పరిహారం పాటించినా ప్రతికూల ఫలితాలు రావొచ్చని అంటున్నారు. అందుకే అనుభవం ఉన్న జ్యోతిష్య నిపుణుల సూచనలు తీసుకోవాలని చెబుతున్నారు. ప్రస్తుతం కూడా భారతీయ సంప్రదాయాల్లో నల్ల దారం ప్రత్యేక గుర్తింపు కొనసాగిస్తోంది. విశ్వాసం, ఆచారం, జ్యోతిష్యం కలిసిన సంప్రదాయంగా చాలామంది దీనిని భావిస్తున్నారు.
