డిప్యూటీ సీఎం బూడి ముత్యాల నాయుడు స్వగ్రామంలో శనివారం హైటెన్షన్ వాతావరణం నెలకొంది. బూడి ఇంటిపై డ్రోన్లు ఎగరవేస్తున్నారంటూ, రెక్కీ నిర్వహిస్తున్నారంటూ బీజేపీ శ్రేణులపై వైసీపీ కార్యకర్తలు దాడిచేశారు. దీంతో బీజేపీ కార్యకర్తలను పరామర్శించేందుకు అనకాపల్లి లోక్ సభ బీజేపీ అభ్యర్థి సీఎం రమేష్ రాగా.. తారువలో ఉద్రిక్త పరిస్థితులు ఏర్పడ్డాయి. ఇదే సమయంలో సీఎం రమేష్‌ను పోలీసులు అరెస్ట్ చేసి తీసుకెళ్తుండగా.. ఆయన కాన్వాయిపై కొంత మంది దాడి చేయడం ఉద్రిక్తతలను మరింత పెంచింది.
మరోవైపు బూడి ముత్యాలనాయుడు తనపై దాడిచేశారంటూ ఆయన బావమరిది గంగాధర్.. దేవరాపల్లి పోలీస్ స్టేషన్లో ఫిర్యాదు చేశారు. ఘటనపై సమాచారం అందుకున్న అనకాపల్లి లోక్ సభ నియోజకవర్గం బీజేపీ అభ్యర్థి సీఎం రమేష్..దేవరాపల్లి పోలీస్ స్టేషన్‌కు చేరుకుని నిందితులపై చర్యలు తీసుకోవాలని డిమాండ్ చేశారు. అలాగే బూడి ముత్యాల నాయుడు మీద హత్యాహత్నం కేసు నమోదుచేయాలంటూ స్టేషన్ ఎదుట బైఠాయించడంతో ఉద్రికత్త తలెత్తింది. అయితే బీజేపీ నేత గంగాధర్ ఇంటిని పరిశీలిస్తానంటూ సీఎం రమేష్ తారువ గ్రామానికి రావటంతో మరోసారి హైటెన్షన్ వాతావరణం ఏర్పడింది. అదే సమయంలో బూడి ముత్యాల నాయుడు తారువలో ఎన్నికల ప్రచారంలో ఉండటంతో టెన్షన్ వాతావరణం ఏర్పడింది. అయితే పోలీసులు పెద్ద ఎత్తున మోహరించి రెండు వర్గాలను అడ్డుకున్నారు.
కానీ.. గాయపడిన బీజేపీ కార్యకర్తలను పరామర్శించేంత వరకూ తాను తారువ విడిచి వెళ్లేది లేదంటూ సీఎం రమేష్ భీష్మించుకుని కూర్చోవటంతో పోలీసులు ఆయన్ని అదుపులోకి తీసుకున్నారు. అనంతరం అక్కడి నుంచి దేవరాపల్లి స్టేషన్‌కు తరలించే సమయంలో.. వైసీపీ శ్రేణులు దాడి చేశాయి. సీఎం రమేష్ వాహనంతో పాటు కాన్వాయ్‌లోని మరో మూడు కార్లపై దాడి చేశారు. ఈ ఘటనలో సీఎం రమేష్ చొక్కచిరిగిపోగా.. ఆయనకు స్వల్ప గాయాలయ్యాయి. మరోవైపు దాడి చేసినంత మాత్రాన భయపడిపోనన్న సీఎం రమేష్.. కేంద్ర బలగాల సాయంతో తారువలో ప్రచారం చేస్తానని చెప్పారు. తనపై జరిగిన దాడి గురించి ఈసీకి ఫిర్యాదు చేస్తానని చెప్పారు.
Visakhapatnam
Anakapalli
Lok Sabha
Bjp Candidate
Cm Ramesh
Arrest
Madugula
