మహా శివరాత్రి పర్వదినాన శివయ్యను రకరకాల అభిషేకాలతో, అర్చనలతో భక్తులు కొలుస్తుంటారు. అయితే, ఈ పవిత్ర రోజున శివాలయంలో గానీ లేదా ఇంట్లో గానీ నారికేళ దీపం వెలిగించడం అత్యంత శక్తివంతమైన ఫలితాలను ఇస్తుందని పురాణాలు చెబుతున్నాయి. నారికేళం అంటే కొబ్బరికాయ.. మానవ శరీరానికి, అహంకారానికి ప్రతీకగా దీనిని భావిస్తారు. ఈ దీపం వెలిగించడం వల్ల శివుని అనుగ్రహం పొంది, జీవితంలోని అడ్డంకులు ఎలా తొలగిపోతాయో ఇప్పుడు చూద్దాం.
సాధారణ ప్రమిద దీపాలకు భిన్నంగా కొబ్బరికాయతో దీపం వెలిగించడం వెనుక నిగూఢమైన జ్యోతిష్య, ఆధ్యాత్మిక అర్థాలు ఉన్నాయి. కొబ్బరికాయలోని మూడు కళ్లు శివుని ముక్కంటికి సంకేతం. ఈ దీపాన్ని పద్ధతి ప్రకారం వెలిగిస్తే తీరని కోరికలంటూ ఏమీ ఉండవని భక్తుల ప్రగాఢ విశ్వాసం. నారికేళ దీపం ఎలా వెలిగించాలి? దాని వెనుక ఉన్న ఆ విశిష్టమైన ప్రయోజనాలు ఏంటో ఇప్పుడు వివరంగా మీకోసం.
నారికేళ దీపం ఎలా వెలిగించాలి?
ఒక పీచు తీసిన కొబ్బరికాయను తీసుకుని, దానిని సమానంగా రెండు భాగాలుగా పగలగొట్టాలి. లోపల ఉన్న కొబ్బరి నీటిని పక్కన తీసి ఉంచాలి.
కొబ్బరి చిప్పలను నీటితో శుభ్రం చేసి, బయట వైపు పసుపు, కుంకుమలతో అలంకరించాలి.
ఆ కొబ్బరి చిప్పలను ప్రమిదలుగా వాడుతూ, అందులో ఆవు నెయ్యి లేదా నువ్వుల నూనె పోయాలి.
దూదితో చేసిన వత్తులను వేసి, శివలింగం ముందు గానీ లేదా ఈశాన్య మూలలో గానీ ఉంచి వెలిగించాలి. ‘ఓం నమః శివాయ’ అనే మంత్రాన్ని జపిస్తూ దీపం వెలిగించడం శ్రేష్ఠం.
నారికేళ దీపం వల్ల కలిగే ప్రయోజనాలు:
ఆర్థిక ఇబ్బందుల తొలగింపు: నారికేళ దీపం వెలిగించడం వల్ల ఇంట్లోని దారిద్య్రం తొలగిపోయి, లక్ష్మీ కటాక్షం సిద్ధిస్తుందని నమ్ముతారు. ముఖ్యంగా అప్పుల బాధలతో సతమతమయ్యేవారికి ఇది గొప్ప పరిహారం.
ఆరోగ్య ప్రాప్తి: దీర్ఘకాలిక వ్యాధులతో బాధపడేవారు శివరాత్రి రోజంతా ఉపవాసం ఉండి ఈ దీపం వెలిగిస్తే ఆరోగ్యం మెరుగుపడుతుందని విశ్వాసం.
అహంకార వినాశనం: కొబ్బరికాయ పగలగొట్టడం అంటే మనలోని అహాన్ని వదిలిపెట్టడం. దీపం వెలిగించడం ద్వారా జ్ఞానోదయం కలిగి, మానసిక ప్రశాంతత లభిస్తుంది.
కోరికల నెరవేర్పు: పెళ్లి కావలసిన వారు, సంతానం కోరుకునే వారు ఈ పవిత్ర సమయంలో మనస్ఫూర్తిగా ప్రార్థిస్తూ నారికేళ దీపం వెలిగిస్తే శివుని అనుగ్రహం తప్పక లభిస్తుంది.
నకారాత్మక శక్తి దూరం: ఈ దీపం వెలిగించడం వల్ల ఇంట్లోని ప్రతికూల శక్తులు నశించి, సానుకూల తరంగాలు ఏర్పడతాయి.
