Telangana: బిర్యానీ తిని యువకుడు మృతి.. 15 మందికి అస్వస్థత

మెదక్ జిల్లా నర్సాపూర్‌లో ఫుడ్ పాయిజన్ ఘటన కలకలం రేపింది. ఓ రెస్టారెంట్‌లో మండి బిర్యానీ తిన్న పలువురు అస్వస్థతకు గురయ్యారు. వాంతులు, విరేచనాలతో ఆసుపత్రిలో చేరిన వారిలో ఓ యువకుడు చికిత్స పొందుతూ మృతి చెందడం తీవ్ర ఆందోళనకు గురిచేస్తోంది. వివరాల్లోకి వెళ్తే.. నర్సాపూర్‌లోని వన్ ప్యాలెస్ రెస్టారెంట్‌లో మండి బిర్యానీ తిన్న పలువురు తీవ్ర అస్వస్థతకు గురయ్యారు. దీంతో వాంతులు, విరేచనాలతో బాధపడుతున్న 15 మందిని నర్సాపూర్ ఏరియా ఆసుపత్రికి తరలించారు. అక్కడ వైద్యులు వారికి చికిత్స అందిస్తున్నారు. ఇదే ఘటనలో సాయిరాం (19) అనే యువకుడి పరిస్థితి విషమంగా మారడంతో మెరుగైన వైద్యం కోసం సంగారెడ్డి జిల్లా ప్రభుత్వ ఆసుపత్రికి తరలించారు. అక్కడ చికిత్స పొందుతూ సాయిరాం మృతి చెందాడు. దీంతో అతడి కుటుంబంలో విషాదం నెలకొంది.

మరోవైపు, మిగిలిన 14 మంది నర్సాపూర్ ఏరియా ఆసుపత్రిలో చికిత్స పొందుతున్నారు. ఒకే రెస్టారెంట్‌లో ఆహారం తీసుకున్న పలువురు ఒకేసారి అస్వస్థతకు గురికావడం, వారిలో ఓ యువకుడు మృతి చెందడంతో ఈ ఘటన స్థానికంగా చర్చనీయాంశంగా మారింది. అయితే, మండి బిర్యానీ తిన్న తర్వాత బాధితులు అస్వస్థతకు గురైనట్లు సమాచారం ఉన్నప్పటికీ, ఫుడ్ పాయిజన్‌కు ఖచ్చితమైన కారణం ఇంకా అధికారికంగా నిర్ధారణ కాలేదు. ఆహార నమూనాల పరీక్షలు, వైద్య నివేదికలు, సంబంధిత అధికారుల విచారణ అనంతరం అసలు కారణాలు వెలుగులోకి రావాల్సి ఉంది.

ఈ ఘటనపై ఆహార భద్రతా అధికారులు సమగ్ర విచారణ చేపట్టాలని స్థానికులు డిమాండ్ చేస్తున్నారు. రెస్టారెంట్‌లో ఆహార నాణ్యత, పరిశుభ్రత ప్రమాణాలు పాటించారా అనే అంశాలపై స్పష్టత రావాల్సి ఉంది. ఈ నేపథ్యంలో ఉమ్మడి మెదక్ జిల్లా పరిధిలోని హోటళ్లు, రెస్టారెంట్లలో ఆహార భద్రతా ప్రమాణాలపై అధికారులు ప్రత్యేక దృష్టి సారించాలని పలువురు కోరుతున్నారు.