Jewelry Theft: జాయాలుకాస్ షోరూమ్ లో కిలో బంగారం చోరీ.. ఎలా దొరికాడో తెలుసా?

Jewelry Theft: నేటి రోజుల్లో దొంగల ఆగడాలు మితిమీరిపోతున్నాయి. ఎప్పుడు ఏ రూపంలో వచ్చి దోచుకెళ్తారో తెలియని పరిస్థితి. అయితే.. బయటి వ్యక్తుల కంటే మన కళ్ల ముందే ఉంటూ, మనతో కలిసి పనిచేస్తూ, మన నమ్మకాన్ని ఆయుధంగా చేసుకుని దెబ్బతీసే ‘వెన్నుపోటు’ దొంగలు మరీ ప్రమాదకరంగా తయారయ్యారు.

తాజాగా ఒక జ్యువెలరీ షోరూంలో చోటుచేసుకున్న ఘటనే దీనికి నిదర్శనం. పొట్టకూటి కోసం పనిలో చేరిన ఒక వ్యక్తి, యజమాని నమ్మకాన్ని చూరగొన్నాడు. అంతా సవ్యంగా సాగుతోందనుకునే లోపే.. అదను చూసి తాను పనిచేస్తున్న షోరూమ్కే కన్నం వేశాడు. పక్కా స్కెచ్లో నగలను దోచుకెళ్లి, యజమాని తేరుకునేలోపే మాయమైపోయాడు.

హైదరాబాద్ లోని ప్రముఖ వ్యాపార కేంద్రమైన పంజాగుట్టలోని జాయాలుకాస్ జ్యువెలరీ షోరూమ్లో మూడు రోజుల క్రితం ఒక దారుణమైన దొంగతనం వెలుగుచూసింది. షోరూమ్లో నమ్మకంగా పనిచేస్తున్న ఓ ఉద్యోగి.. తన పరిధిలోని ఒక కిలో బంగారం మాలను అత్యంత చాకచక్యంగా దొంగిలించినట్లు యాజమాన్యం గుర్తించింది. విలువైన ఆభరణం కనిపించకపోవడంతో అనుమానం వచ్చిన నిర్వాహకులు వెంటనే పంజాగుట్ట పోలీసులకు ఫిర్యాదు చేశారు.

కేసు నమోదు చేసుకున్న పోలీసులు రంగంలోకి దిగి లోతైన దర్యాప్తు చేపట్టారు. షోరూమ్లోని సీసీటీవీ కెమెరాలను క్షుణ్ణంగా పరిశీలించగా.. నిందితుడైన ఉద్యోగి సమయం చూసి ఆ బంగారు మాలను తీసుకుని బయటకు వెళ్తున్న దృశ్యాలు స్పష్టంగా కనిపించాయి. ఈ కీలక ఆధారాలతో పోలీసులు నిందితుడిని అదుపులోకి తీసుకుని విచారించగా.. అతను నేరాన్ని అంగీకరించాడు.

నిందితుడి నుంచి అపహరణకు గురైన ఒక కేజీ బంగారాన్ని పోలీసులు స్వాధీనం చేసుకున్నారు. ప్రస్తుతం ఈ కేసులో సదరు ఉద్యోగిని అరెస్ట్ చేసిన పోలీసులు.. ఈ చోరీ వెనుక మరికొంతమంది వ్యక్తుల ప్రమేయం ఉందా అనే కోణంలో విచారణ జరుపుతున్నారు. సాంకేతిక ఆధారాలు (CCTV) ఈ కేసును ఛేదించడంలో కీలక పాత్ర పోషించాయి. ఈ ఘటన స్థానిక వ్యాపార వర్గాల్లో పెద్ద చర్చకు దారితీసింది.